നോക്കെത്താ ദൂരത്ത് കണ്ണുംനട്ട് എന്ന സിനിമയില്‍പറയുംപോലെയുള്ള "എല്ലാം കാണാന്‍പറ്റുന്ന കൂളിങ് ഗ്ലാസ്" തപ്പി യുവാക്കള്‍ അക്കാലത്ത് കടകള്‍തോറും കയറിയിറങ്ങിയെന്ന് പറയാറുണ്ട്. അത്രയൊന്നും ഇല്ലെങ്കിലും, വിവരസാങ്കേതികവിദ്യാ ലോകത്തെ ഭീമനായ ഗൂഗിള്‍ എല്ലാം കാണാന്‍പറ്റുന്ന കണ്ണടയുമായി ഉടന്‍ എത്തും. ഗൂഗിള്‍ ഗ്ലാസ് എന്നു പേരിട്ട ഈ "സ്മാര്‍ട്ട്" കണ്ണടയുടെ ഫ്രേമില്‍തന്നെ ഒരു ബാറ്ററി ഒളിഞ്ഞുകിടപ്പുണ്ട്.
ഏകദേശം പുരികത്തിന്റെ മുകളില്‍ സ്ഥിതിചെയ്യുന്ന ഡിസ്പ്ലേയില്‍ നോക്കിയാല്‍ നിങ്ങള്‍ക്ക് ഫോണിലോ കംപ്യൂട്ടറിലോ ഒക്കെ കാണുന്നപോലെ ദൃശ്യങ്ങളും വീഡിയോകളുമൊക്കെ കാണാം. ചുരുക്കിപ്പറഞ്ഞാല്‍ ശരീരത്തില്‍ ധരിക്കാവുന്ന കംപ്യൂട്ടറായ ഈ കണ്ണട പരിമിതികളോടെയുള്ള സ്മാര്‍ട്ഫോണ്‍ ആകുമോ എന്നും കണ്ടറിയാം. ഈ കണ്ണടയില്‍ ക്യാമറ, മൈക്രോഫോണ്‍, ഗ്ലോബല്‍ പൊസിഷനിങ് സിസ്റ്റം (ജിപിഎസ്) എന്നിവയും അടങ്ങിയിരിക്കുന്നു. മൈക്കിലൂടെ കണ്ണടയോട് ഫോട്ടോ എടുക്കാനോ, വീഡിയോ പിടിക്കാനോ പറഞ്ഞാല്‍ അപ്പോള്‍തന്നെ അത് അനുസരിക്കും. വഴി ചോദിക്കണമെങ്കിലും കണ്ണയോടു ചോദിച്ചാല്‍ മതി. കിറുകൃത്യമായി പറഞ്ഞുതരും ഈ കംപ്യൂട്ടര്‍ കണ്ണട. ഇനിയിപ്പോള്‍ നിങ്ങളുടെ മുന്നില്‍ കാണുന്ന കാര്യം കുറെ സുഹൃത്തുക്കള്‍ക്ക് ഗൂഗിള്‍ ഹാങ്ഔട്ട് വഴി ലൈവായി കാണിക്കണമോ. അതും നടക്കും. ഗൂഗിളിന്റെ സ്വന്തം ആന്‍ഡ്രോയിഡ് ഓപ്പറേറ്റിങ് സിസ്റ്റമാകും ഈ കണ്ണടയുടെ ഹൃദയഭാഗത്ത്. കണ്ണടയോട് ചോദ്യങ്ങള്‍ ചോദിച്ചാല്‍ ഗൂഗിള്‍ തെരഞ്ഞ് ഉത്തരങ്ങള്‍ ഡിസ്പ്ലേയില്‍ എത്തിക്കും എന്നുള്ളത് എടുത്തുപറയേണ്ടതില്ലല്ലോ.
നിങ്ങളുടെ സാധാരണ കണ്ണടയുടെ മുകളില്‍ ഇടുന്ന ഡിസൈനിലും ഗൂഗിള്‍ കണ്ണട ലഭ്യമാകും. അതുകൊണ്ട് ആ പേടിയും വേണ്ട. ഈ വര്‍ഷം അവസാനത്തോടെ വിപണിയില്‍ എത്തുമെന്നു പ്രതീക്ഷിക്കുന്ന ഈ മാന്ത്രിക കണ്ണടയുടെ വില ഒരു സ്മാര്‍ട്ട്ഫോണോളം വരുമെന്നാണ് ഊഹാപോഹങ്ങള്‍. ഗൂഗിള്‍ കണ്ണടയുടെ "ഡെവലപ്പര്‍ വേര്‍ഷന്" അല്‍പ്പം കൂടിയ വിലയായ 1500 ഡോളറിനാണ് (ഏകദേശം 90,000 രൂപ) ഈയിടെ പ്രി-ഓര്‍ഡര്‍ ചെയ്യാന്‍ ലഭ്യമായത്.
ഗൂഗിള്‍ ഒരു പരസ്യക്കമ്പനി ആണെന്നുള്ള കാര്യം നമ്മള്‍ മറക്കരുത്. ഈ കണ്ണട ഇട്ടിട്ട് നിങ്ങള്‍ എങ്ങോട്ടെങ്കിലും നോക്കിയാല്‍, ഒരുപക്ഷേ അതുമായി ബന്ധപ്പെട്ട പരസ്യങ്ങള്‍ നിങ്ങളുടെ കണ്ണടയില്‍ തെളിഞ്ഞുവന്നേക്കാം. സ്വകാര്യത കുറേക്കൂടി ഇല്ലാതാകുമോ ഈ കുട്ടിച്ചാത്തന്‍ കണ്ണട വന്നാല്‍? നിങ്ങള്‍ പോയ വഴിയില്‍, നിങ്ങള്‍ കണ്ട കാഴ്ചകളെല്ലാം ഇനി ഗൂഗിളിനെ അറിയിക്കണോ എന്നൊക്കെ ചോദ്യങ്ങള്‍ ഉയരുന്നുണ്ട്്. ഈ അത്ഭുതം കാണാന്‍ നിങ്ങള്‍ക്ക് ഇനി ഏതാനും മാസം മതിയാകും. അതുവരെ http://www.google.com/glass എന്ന വിലാസത്തില്‍ ചെന്ന് സ്വപ്നംകാണുക.
No comments:
Post a Comment